Казанда Татарстан Мәгариф һәм фән министрлыгы биналарында төзекләндерү-реставрация эшләре башкару өчен 624,3 млн сум акча бүлеп биреләчәк.
Биналарның икесе дә мәдәни мирас объекты булып тора. Тендер дәүләт сатып алулары порталында урнаштырылган.
Реставрация эшләре 1774 елда төзелгән Р.Г.Каменев – Крупенниковлар йортына һәм XIX гасыр башында Казан университеты типографиясе урнашкан булган П.П.Деева – П.А.Манасеин йортына кагылачак.
Техник биремгә биналарның архитектура күренешен торгызудан алып заманча җиһазлар һәм инвентарь сатып алуга кадәр масштаблы эшләр комплексы кергән. Проект шулай ук тирә-яктагы мәйданнарны төзекләндерүне дә күздә тота.
Эшләрне 2027 елның 30 мартына төгәлләргә планлаштыралар. Проект Татарстан Республикасы бюджетыннан финансланачак.
Сүз уңаеннан, хәзерге вакытта “Яшәү өчен инфраструктура” илкүләм проекты гамәлгә ашырыла.
