Татарстан Профсоюзлар федерациясе рәисе, республика Дәүләт Советы депутаты, «Минем карьерам Бердәм Россия белән» партия проекты координаторы Елена Кузьмичева «Бердәм Россия» партиясенең башлангыч тавыш бирүендә катнашуга гариза тапшырган. Бу хакта «Бердәм Россия»нең Татарстандагы бүлеге матбугат хезмәте хәбәр итә.
Бу карарын ул хезмәткәрләрнең мәнфәгатьләрен яклауны көчәйтү зарурилыгы белән аңлаткан. Аның әйтүенчә, профсоюзлар тавышы ишетелергә тиеш, чөнки нәкъ менә шушы бергәлек хезмәт ияләренең мәнфәгатьләрен чагылдыра.
Кузьмичева билгеләп үткәнчә, ул хезмәттәшләре һәм социаль партнёрлары белән бергә, эшләүчеләрнең хокукларын өстәмә яклауга юнәлдерелгән законнар эшләүне төп бурычларның берсе дип саный. Аның басым ясап әйтүенчә, биредә сүз хезмәткәрләрнең юридик якланылышын көчәйтү мөмкинлеге бирердәй хокукый база булдыру турында бара.
Профсоюзлар федерациясе сүзләренә караганда, бу эш белән ул Татарстан Дәүләт Советы депутаты һәм Социаль сәясәт комитеты әгъзасы сыйфатында шөгыльләнә. Ул хезмәт кешесе мәнфәгатьләрен яклауга юнәлдерелгән башлангычларга этәргеч бирүдә, норматив документлар эшләү һәм закон дәрәҗәсендә карарлар кабул итүдә катнаша.
Партия башлангыч тавыш бирү процедурасы нәтиҗәләре буенча 2026 елның көзендә узачак тугызынчы чакырылыш Дәүләт Думасына депутатлар сайлауда катнашу өчен кандидатлар билгеләячәк. Хәзерге вакытта төбәк оештыру комитетына башлангыч тавыш бирүдә катнашу өчен 49 гариза кергән, шуларның 44е теркәлгән инде.
