Акчаны ялгыш кеше счетына күчерү — еш очрый торган хәл.
Мондый очракта нишләргә кирәклеген гражданлык эшләре буенча юрист Карина Асанова аңлатты, дип яза Газета.Ru.
Белгеч сүзләренчә, төп кагыйдә гади: әгәр кеше акчаны законлы нигезсез алган икән, ул аны кире кайтарырга тиеш. Бу «нигезсез баету» нормалары белән көйләнә.
Әгәр сез телефон номеры буенча күчереп, бер сан белән ялгышкансыз икән:
— алучы белән элемтәгә кереп, акчаны кире сорарга кирәк;
— күп очракта кешеләр аңлап, акчаны кире кайтара;
— әгәр баш тартса — судка мөрәҗәгать итәргә туры килә.
Ә инде карта номеры буенча ялгыш күчергән очракта хәл катлаулырак:
— алучы белән турыдан-туры элемтәгә чыгу мөмкин түгел;
— башта банкка мөрәҗәгать итеп, хатаны теркәргә кирәк;
— аннары суд аша акчаны кайтару процессы башлана.
Юрист билгеләп үткәнчә, судка гариза бирү өчен җавап бирүченең шәхси мәгълүматлары кирәк була. Шуңа күрә башта банк аша тиешле мәгълүматлар алына, аннары эш судка җибәрелә.
Кайбер банкларда мондый очракларны хәл итү өчен махсус механизмнар да бар, шуңа күрә беренче чиратта үз банкыгызга мөрәҗәгать итү мөһим.
Билгеле булганча, «Яшәү өчен инфраструктура» илкүләм проекты гамәлгә ашырыла.
