Балтась ёросысь удмуртъёс тулыс бусы ужъёсты йылпумъянлы сӥзем сяме пыӵам праздниксэс пусйизы.
28-тӥ инвожое Ципья черкогуртын ортчиз удмурт калыклэн яратоно праздникез — «Гырон быдтон».
Вашкала дырысен удмуртъёс, огазе люкаськыса, «Гырон быдтонэз» пусйылӥзы, бусые потыса, ӝук пӧзьтылӥзы, ю-нянь мёд удалтоз шуыса, инмаръёслы вӧсяськылӥзы. Нош туннэ та чебер праздник, удмуртъёслэн сям-йылолъёсынызы, лулчеберетэнызы тодамтэм сяна, пӧртэм поколениосты, пӧртэм йӧскалыкъёсты эшъяськон кусыпъёсын герӟась выж выллем но луэ. Ципья ёросын ортчем «Гырон быдтонын» талы нимысьтыз саклык висъямын вал: праздниклэн валтӥсь аспӧртэмлыкез луиз калыкъёслэн куспазы тупаса но ог-огзэс гажаса улэмзы, кайгуэз но шумпотонэз валче люкыны быгатэмзы.
Люкаськемъёслы шулдыръяськыны лумбыт кыстӥськем зор но люкетыны ӧз быгаты. Мылкыд карисьёс шудӥзы-вожвылъяськизы, кырӟазы-эктӥзы. Ваньзэ тае туспуктэмъёсысь но адӟыны быгатӥськоды.